BR LA UNION – Ituloy ti Senate Impeachment Court ti panangusig kenni Vice President Sara Duterte ita nga aldaw ti Lunes, Agosto 24, 2026.
Maituloy iti direct examination ken cross-examination ti defense counsel, ken panagsalodsod dagiti senator-judge kenni Gina Acosta, ti sigud nga special disbursing officer ti Office of the Vice President (OVP).
Ibilang ti House prosecution team a napateg ti testimonya ni Acosta.
Daytoy ket kalpasan nga inaklon na iti korte nga in-affidavit ken mandar ni VP Sara ti panang-encash ken panangiyakar ti ₱125 milyon a confidential funds kenni Col. Raymund Dante Lachica a maysa a non-organic personnel ti OVP.
Segun iti prosecution, umdasen daytoy tapno paneknekan nga adda iregularidad iti pondo.
Maipalagip pay a naideklara ni Gina Acosta kas umuna nga “hostile witness” ti prosekusyon tapno ipalubos dagiti leading questions seknan iti panangipalospos ken panagiggem ti confidential funds iti OVP.
Kinumpirma met ni Senate President Sherwin Gatchalian, nga agtalinaed nga alas 10:00 ti agsapa iti iskedyul ti panagusig para ita a lawas.
Saan pay laeng a maaprubaran ti singasing nga iyakar iti malem wenno inayon ti aldaw ti Biyernes a panagusig.
Namnamaen nga agbalin a napartak ken tuluy-tuloy ti sesyon ita nga aldaw ti lunes kalpasan a makanselar ti panagdengngeg idi Martes ken Miyerkules gapwanan ti dakes a panawen a tugot ti Habagat.
