BR LA UNION – Kinumpirma ti hostile witness a ni sigud nga Office of the Vice President (OVP) Special Disbursing Officer (SDO) Gina Acosta iti opisyal a testimonya na a ni VP Sara Duterte ti nangimandar kenkuana nga ited ti ₱125 milyon a confidential funds kenni Col. Raymund Dante Lachica.
Inaramid ni Acosta iti nasao a rebelasyon iti sangwanan ti Senate Impeachment Court iti maika-16 nga aldaw ti impeachment trial ni VP Sara idi kalman, Agosto 18.
Imbaga ni Acosta iti testimonya na a kalpasan a ma-encash wenno maisukat ti tseke iti confidential funds, inawagan na a dagus ni Col. Lachica.
Ni Col. Lachica ti mangidadaulo idi ti Vice Presidential Security and Protection Group (VPSPG).
Inlanad pay ni Acosta iti dua a rason nu apay nga inted na iti confidential funds kenni Col. Lachica. Umuna, gaputa bilin daytoy ni VP Sara kas Head of Agency ken maikadwa, ni Lachica iti eksperto a nangipat-patungpal iti confidential operations iti OVP.
Sinalodsod met ni Trial Presiding Officer Francis “Chiz” Escudero nu trabaho ti security officer a gastusen iti na-disburse a confidential fund ni Acosta kas special disbursing officer.
Simmungbat met ti “saan” ni Acosta gaputa trabaho daytoy ti Special Disbursing Officer, ngem apaman kunana a mairwar iti kuwarta ket pagrebbengan met ti security officer nga agsumite ti utilization report kas pammaneknek a naipatungpal ti confidential activities.
Kabayatanna, binilin ni Trial Presiding Officer Francis “Chiz Escudero ni Acosta nga agsubli idiay senado tapno agtestigo pay iti sidonng ti kapada a subpoena.
