Inakusaran ni Atty. Paolo Panelo, spokesperson ni Bise Presidente Sara Duterte, ti administrasion ni Presidente Marcos ti mapapati nga panagusar kadagiti institusion ti gobierno para iti pampolitika a panangidadanes, kalpasan ti palawag ti National Bureau of Investigation (NBI) mainaig iti mapapati a saan a panagtutunos nga assets nga indeklara ti Bise Presidente iti Statement of Assets, Liabilities and Net worth wenno SALN-na.
Segun kenni Panelo, inruar a dagus ni NBI Director Melvin Matibag ti mapapati a resulta ti imbestigasionda iti media, a saanna nga immuna nga impakaammo kenni Duterte dagiti alegasion ken saan na nga inikkan daytoy ti gundaway a sumungbat.
Kinuestion pay ni Panelo ti a saan a panangiraman ti prosecution dagiti naduktalan ti NBI iti impeachment trial, nu sadino a mabalin nga adalen ken kontraen ti depensa dagiti ebedensiya.
Nainget a pinaglibakan ni Duterte babaen iti spokesperson na dagiti alegasyon ti saan nga umiso a deklarasyonna iti sanikua.
Impaganetget ni Panelo nga umiso ken napudno ti panangideklara ti Bise Presidente kadagiti assets ken liabilities-na, ken nakasagana daytoy a mangpaneknek iti impeachment trial wenno iti Ombudsman no maikkan iti pormal a pakaammo.
