BR LA UNION – Tarigagay ti International Criminal Court trial chamber a sumango ti nakadetine a ni sigud a President Rodrigo Duterte iti status conference inton Setyembre 7 seknan ti kaso a crimes against humanity.
Iti panagdengeg idi Hunyo 23, imbaga ni Presiding Judge Joanna Korner a namnamaen a napateg iti Sept. 7 hearing agsipudta makumpleto iti report ti panel dagiti eksperto ken agbalin metten nga available ti obserbasyon dagiti partido.
Namnamaen nga isumite dagiti eksperto iti report sakbay ti Agosto 18, ken dagiti palawag ti agsumbangir a kampo agingga Agosto 31.
Saan a dimmar-ay ni Duterte iti nasao a panagdengngeg ken inrepresentar isuna ti abogado na a ni Peter Haynes.
Impaganetget ti ukom a namnamaen da a personal a dumar-ay ti sigud a Presidente inton Sept. 7 malaksid nu adda ti medical condition.
Natalantan iti panagtataripnong dagiti allagaden iti panangiggem ti confidential information ken napalagipan dagiti abogado a saan nga agkomento iti ruar ti korte.
Binabalaw pay ni Korner dagiti immuna a waragawag ti sigud a defense counsel a ni Nicholas Kaufman, a kunana ket saan a maiparbeng ken makadadael iti proseso.
Impaganetget ti ukom, a ti umno a lugar ti argumento ket iti uneg ti korte, saan nga iti media wenno opinyon ti publiko. Dinakamat na pay iti panagwaras dagiti biddut nga impormasyon seknan iti kaso.
Ti sumaruno nga status conference ket inton Hulyo 14, Sept. 7, Oktubre 13, ken Nov. 2, sakbay ti nakatuding a panagusig inton Nobyembre 30, 2026.
