BR LA UNION – Nainget a banbantayan ken pinalagipan ti Environment and Natural Resources division nga adda iti idong ti opisina ti Mayor idiay ili ti Bangar dagiti adddaan ti negosyo, seknan iti panag-renew ti business permit partikular dagiti junkshop ken furniture shops/sash factory para ita a tawen 2025.
Posible nga maipaserra dagiti ilegal wennu awanan ti permit a junk shop ken furniture gapo ti posible a peggad iti aglawlaw manipod kadagiti maus-usar nga alikamen para iti negosyoda.
Segun pay iti opisina, napateg ti panangmonitor kadagiti junkshop, para iti panangaywan iti aglawlaw gapo ta dagitoy a negosyo ket addaan ti hazardous materials manipod kadagiti materyales,mabalin a pagtaudan ti kontaminasyon iti daga, danum ken angin, kasta met ti panagibelleng iti kayo.
Gapu iti daytoy, insingasing ti lokal a gobyerno ti Bangar iti maysa nga ordinansa tapno malapdan ti dakes nga epekto dagiti basura iti aglawlaw ken nailanad ti nainget a panagtungpal iti kaadda ti business permit sakbay ti operasyon.
Kasta met, kasapulan ti panangmonitor kadagiti furniture shops.
Daytoy ket makatulong a mangitandudo kadagiti natalged nga aramid, mangkissay iti pannakadadael ken mapasayaat iti aglawlaw.
