Dagiti illegal ken delikado nga aksyon ti China idiay West Philippine Sea ti maysa kadagiti nadakamat iti trilateral phone call meeting da Presidente Ferdinand Marcos Junior, Japanese Prime Minister Ishiba Shigeru ken outgoing US Pres. Joe Biden.
Daitoy ket maibasar ti statement nga inruar ti White House kalpasan ti panagsarita dagiti tallo a lider a nagpaot ti 35 a minutos.
Iti agdama ket kumarkaro iti kinaagresibo ti China, partikular iti panagsango daitoy kadagiti barko ti Pilipinas.
Mainaig daitoy ti kaudian nga aktibidad ti Chinese Coast Guard monster ship a nasipdutan iti taaw nga asideg ti Zambales nga adda iti uneg ti exclusive economic zone ti Pilipinas.
Segun iti White House, nagsaritaan dagiti tallo a lider no kasano nga ad-adda a mapapigsa ti trilateral maritime security ken economic cooperation.
Immanamong met ni Presidente Marcos, Ishiba ken Biden tapno ad-adda a mapatibker ti relasion nu kasta ket masigurado ti nawaya ken silulukat nga Indo-Pacific region.
Iti nadakamat a miting, dinayaw ni Biden ni Presidente Marcos iti natibker a takderna kontra iti napeggad nga aramid ti China idiay West Philippine Sea.
Itultuloy met ni Presidente Marcos nga ipatpateg ken saan a pulos nga isurrender uray maysa a pulgada ti teritorio ti Pilipinas.
Iti sabali a bangir, makalawas laeng nga agtalinaed ni Biden iti opisinana gapu ta naikeddeng metten a ni Presidente-elect Donald Trump ti mangala iti akem ti baro a kina-Presidente ti Estados Unidos inton Enero 20, 2025.
