Posible nga agbalin kas kapaotan nga impeachment trial iti pakasaritaan ti Pilipinas iti panagusig kontra kenni Bise Presidente Sara Duterte, segun kenni Senate Secretary Renato Bantug.
Maibasar iti patta-patta ti impeachment clerk of court, mabalin a dumanon ti pito a bulan iti agbalin a trial nu mamitlo makalawas iti nakatuding a schedule.
Segun kenni Bantug, iti projection ket nakabasar iti 122 trial days — 92 nga aldaw a kiniddaw ti House Prosecution Panel ken 30 nga aldaw para ti Defense Panel tapno maipresenta ti bukod da nga ebidensiya ken testigo.
Nupay kasta ket posible met a mapapartak ti panagusig nu adu dagiti testigo a maipresentar iti tunggal aldaw.
Nu iyarig ket nagpaot laeng ti 44 nga aldaw ti impeachment trial ni sigud a Chief Justice Renato Corona idi tawen 2012, bayat a 23 nga aldaw met idi kenni sigud a Presidente Joseph Estrada, tawen 2001.
Maipalagip a saan a naileppas ti impeachment kenni Estrada gapo iti panagwalk-out ti House Prosecution Panel gapo iti panagkedked ti Senate Impeachment Court a maluktan ti “second envelope.”
Daitoy iti rason iti pannakapartuat ti EDSA People Power Revolution II nga iti agangay ket nangpaikkat kenkuana iti puesto.
Innayon pay ni Bantug a maysa kadagiti kangrunaan a saganaan ti impeachment court ket ti atiddog a panagusig kabayatan ti panagbalanse iti sabali da a trabaho kas lehislatura, karaman iti panangisayangkat ken panangtingiting kadagiti singasing a linteg kasta met iti national budget.
