BR LA UNION – Agbalin a mas nair-irut iti panangipatungpal ti Ayuda sa Kapos ang Kita (AKAP) program ti Department of Social Welfare and Development (DSWD) ita a tawen.
Daytoy iti inlawlawag ni Department of Budget and Management (DBM) Undersecretary Goddess Hope Libiran kasaruno iti desisyon ti gobyerno nga ikabil iti conditional implementation ti sumagmamano a proyekto a nakapauneg iti 2025 national budget a pinirmaan ni President Ferdinand Marcos Jr. itay nabiit.
Kinuna ni Libiran, inaramid da ti addang tapno masiguro a maaddaan nga ummuna iti nalawag a guidelines ken Implementing Rules and Regulations (IRR) sakbay a mairwar ti pondo.
Segun kenni Libiran, iti nasao a desisyon ket sungbat iti arungaing ti publiko seknan iti maipagarop a biddut a panangusar ti pondo idi napalabas a tawen, a maibagbaga a maus-usar daytoy sagpaminsan para iti bukod nga interes dagiti pulitiko.
Nabilin dagiti ahensya kas iti Department of Labor and Employment (DOLE), National Economic and Development Authority (NEDA), ken DSWD a mangbukel iti nairut a sistema para iti naannayas nga implementasyon ti programa.
Iti sidong ti baro a sistema, saan a mabalin a basta maited ti pondo nga awan ti nalawag a proseso ken accountability.
Tarigagay da a masiguro a dagiti benepisyaryo ti AKAP program ket talaga nga agkasapolan ken iti pondo ket mausar iti umno.
