BR LA UNION – Agtaltalinaed a limitado dagiti mair-irwar nga impormasyon seknan iti pannakatiliw ni sigud a House Committee on Appropriations Chairman Elizaldy “Zaldy” Co gapu iti panaglabsing iti immigration laws idiay Europa.
Segun kenni Virgilio Fonseca, maysa nga Overseas Filipino Worker ken Bombo International News Correspondent idiay Czech Republic, iti Filipino community ti immuna a naka-amwan na iti pannakatiliw ti sigud a kongresista.
Kinunana a ti kangrunaan a rason ti pannakatiliw ni Co ket iti maipagarop a gandat a panagballasiw na iti border ti Czechia ken Germany gapu iti kinakurang iti imet na a dokumento.
Innayon pay ni Fonseca, nairut iti isay-sayangkat ita nga imbestigasyon dagiti otoridad idiay Czech Republic ket iti agdama, awan pay iti inruar nga opisyal a ladawan wenno video seknan ti insidente.
Imbinglay ni Fonseca nga adu kadagiti Pilipino iti nasao a pagilian iti mangnamnama a maibalud ken saanen a makarwar ti pagbaludan ni Co, gaputi inaramid na nga eskandalo iti flood control projects ditoy pagilian.
Aminado ni Fonseca a nangparnuay ti pannakaibabain dagiti Pilipino iti pannakairaman ti maysa nga opisyal ti gobyerno iti maipagarop a nalawa nga isyu ti korapsyon.
Inistorya pay ni Fonseca ti nagbalin a kapadasanna idi damo na ti bumaddek idiay Czech Republic, a tiniliw dagiti otoridad bayat a nakalugan da ti tren.
Inlawlawag na a kasapolan a sumurot kadagiti allagaden uray iti panaglugan ti tren tapno maliklikan ti panangsita ken pannaka-arestar.
