Mamati ti political analyst a ni Professor Dennis Coronacion nga adda ti politika iti likudan ti peace rally ti Iglesia Ni Cristo (INC).
Daytoy ket iti laksid ti panangibaga ti INC a non-partisan ken pangsuporta laeng daitoy ti immun-una a kinuna ti PBBM nga awan ti pagsayaatan ti impeachment complaint kontra kenni VP Sara Duterte.
Segun kenni Coronacion, uray ania nga anggulo ti kitaen ket adda nga adda ti politika a karaman iti nadakamat a rally.
Inyarig ti political analyst ti pannakairaman ti sumagmamano a senador iti rali nga agtugaw kas senador-judges no agtultuloy ti panagdur-as ti impeachment.
Segun kenni Coronacion, ti presensya da iti kastoy a rali ket mangipakita iti takder wenno tignayda iti naisingasing nga impeachment complaint kontra kenni VP Sara.
Mamati ni Professor Coronacion a ti arig na a ‘show of force’ ti INC ket mangapektar iti desision dagiti senatorial candidates.
Kinunana a posible a pagpanpanunotan met dagiti kandidato, nangruna dagiti re-electionists ti maipapan iti takder wenno posisyonda ti maangay nga impeachment vs VP Sara a kangrunaan a topiko ti rali nga inorganisar daitoy a sekta ti relihiyon.
