Indepensa ni Chief Presidential Legal Counsel Juan Ponce Enrile dagiti immun-una a waragawag na a nangkuestion iti implikasion ti rally ti Iglesia ni Cristo(INC) a naangay idi Enero 14, 2025.
Iti panangaklonna a nagbalin a nakappia ti rali, inyebkasna met ti pakaseknanna maipapan iti talaga a panggep ti INC, partikular ti isyu ti politika.
Dinamagna no adda dagiti nainkalintegan a pakaseknan a kayat nga ipakaammo ti kasta a rali, a kunkunana a ti panggep ket napolitikaan ken saan nga pudno nga awag iti talna.
Nupay inaklonna a nasayaat ti pannakaorganisar ti rali, kinunana a maidilig ti rali iti napolitikaan nga addang tapno maimpluensiaan dagiti ahensia ti gobierno, a mabalin a mangsinga iti kabaelanda a mangaramid kadagiti trabahoda iti konstitusion.
Kadagiti immun-una a palawagna, inyebkas ni Enrile ti pakaseknanna iti panangsuporta ti INC iti awag ni Presidente Ferdinand Marcos Junior a saan nga ituloyen ti impeachment kontra kenni Bise Presidente Sara Duterte.
Ad-adda pay a pinagduaduaan ti Chief President Legal Counsel no ti INC, kas maysa a relihioso a grupo, ket rumbeng a mapalubosan a mangimpluensia kadagiti proseso ti konstitusion kas iti impeachment ken no daytoy ket mangdadael laeng iti pannakaipatungpal ti turay ti linteg.
Nupay kasta, inyunay-unay met ti INC a saan a napolitikaan ti rali da.
Impaganetget ni Edwil Zabala, ti pannakangiwat ti INC, a ti naangay a rali ket moral nga apela kadagiti opisial ti gobierno ken saan a napolitikaan a tignay.
