Namnamaen ti Bangko Sentral ng Pilipinas (BSP) a agtalinaed iti nagbaetan ti 2.3% aginggana 3.1% iti lebel ti inflation para iti bulan ti Pebrero 2026.
Segun ti BSP, mabalin a mangigubuay ti inflation iti nangato a presio ti bagas ken lames, produkto a petrolyo iti uneg ti pagilian, ken singir iti kuryente kadagiti serserbisioan ti Meralco.
Manamnama a makissayan iti epektona babaen iti panagbaba ti presio ti nateng, prutas, ken karne, karaman ti balor ti piso kontra dolyar.
Impaganetget ti BSP nga agtultuloy a bantayanda dagiti mapaspasamak iti uneg ken ruar ti pagilian tapno maisgurado a dagiti polisiyada ket agtaltalinaed a maitunos iti panggep ti price stability a makatulong iti sustainable growth ken employment.
Idi Enero, nailista iti inflation ti 2.9%, nababbaba maiyarig iti 3.4% idi Disiembre 2025, gapu ti panagbaba iti presio dagiti sumagmamano nga agricultural products.
Kabayatanna, iti piso ket apagapaman a pimmigsa iti umuna a paset ti Pebrero, a nakatulong iti panangpababa dagiti sumagmamano nga imported inflationary pressures.
Ti nasao a forecast ket napateg gapu ta mangipaay daytoy ti giya kadagiti gumatgatang, negosyo, ken gobierno no kaso nga agplano iti kangitingitan ti pabaliw-pabaliw a presio dagiti kangrunaan a magagatang, ken para iti BSP, iti panangpatalinaed ti nababa nga inflation ket tulbek iti panangpatibker iti ekonomiya ken iti panangpartuat ti ad-ado a trabaho.###
