Awan iti namonitor ti Malacañang Palace a kabaruan nga impormasion seknan iti destabilization plot wenno ti gandat a mangparmek iti gobierno.
Segun kenni Claire Castro, awan pay ti naawatda a report, nupay saan a baro dagitoy a banag.
Nupay awan ti nainaganan, kenuna ni Castro nga ammoda metten no asino ti adda iti likudan dagiti agwarwaras a plano gapu ta adda kano dagiti mangidurduron iti bukodda nga interes ken kayatda ti mangikabil iti sabali a lider.
Kagiddan ditoy ket nagpanawagan ti Palasio iti publiko nga agbalin a nasiput ken saan dagus a mamati kadagiti agwarwaras a fake news ken panangdadael.
Immunan nga imbaga ti Department of National Defense (DND) nga awan ti mamonmonitorda a destabilization activities a konektado iti impeachment case kontra kenni Bise Presidente Sara Duterte.###
