Nangipila iti kampo ni Senador Ronald “Bato” Dela Rosa ti “Extremely Urgent Supplemental Manifestation with Motion” iti Korte Suprema mainaig iti gandat a panangtiliw kenkuana sadiay Senado idi kalman.
Segun iti law firm a Torreon and Partners, mapapati a ginandat dagiti kameng ti National Bureau of Investigation (NBI) a lapdan ti iseserrek ni Dela Rosa iti Senate Session Hall bayat ti session, uray awan ti warrant manipud iti korte ditoy Pilipinas.
Impaganetget ti kampo ti senador a paneknekanna a saannga imahinasion ti panagbutengda iti posible a panagaresto mainaig ti warrant manipud iti International Criminal Court (ICC).
Inawaganda pay daytoy a pannakibiang babaen ti Executive Branch iti Senado kas maysa a “co-equal constitutional body.”
Segun iti kampo ni Dela Rosa, saan a mabalin a tiliwen wenno isuko iti maysa a Pilipino iti ganggannaet a korte kas iti ICC no awan ti due process ken pammalubos manipud iti korte ti Pilipinas.
Kinuestionanda pay iti maipagarup a panangiyeg ni sigud a senador Antonio Trillanes IV iti kopia ti warrant ti ICC iti Senado, gapu ta maysa laeng a pribado nga indibidual nga awan ti autoridadna a mangusar wenno patungpal iti dokumento kontra iti senador.###
