Awan pay iti naipaay nga internet allowance kadagiti mannursuro nangruna kadagiti agisuro iti online class ita a naglukaten iti klase para iti school year 2020 to 2021.
Segun kenni Deped Region 1 director Tolentino Aquino, kinuna na a numan awan pay iti internet allowance a naipaay kadagiti mannursuro ket adda iti cash allowance a naipaay kadagitoy idi Hunyo a mabalin da nga aramaten.
Impanamnana ni Director Tolentino a mangkitkita pay ti DEPED Region 1 kadagiti nagduduma a wagas tapno matulungan dagiti mannursuro para iti new normal.
Segun pay kenkuana, masapol pay a dumalan iti linteg iti pannakaipaay iti internet allowance.
Kabayatanna, iti panaglukat iti klase idi kalman kas maibasar iti datos iti DEPED Region 1, dumanon iti 1,230,542 iti bilang dagiti estudyante a nangrugi a nagadal.
Ti nadakamat a bilang ket manipud kadagiti pampubliko ken pampribado a pagadalan, dagiti adda iti state and local universities ken colleges, uray dagiti non-graded wenno special education learners.
