Impannakkel ni sigud a Sangguniang Panlalawigan Member ken itan ket Officer-in-Charge ti La Union Provincial Tourism Office a ni Ma’am Anabelle De Guzman iti pannakaipasidong iti intero a probinsya ti La Union iti underground cabling kas maiyannurot iti proyekto ni Governor Mario Ortega.
Kinunana a maiyannurot paylaeng daitoy iti ordinansa ti probinsya nga amin nga aerial cables ket agbalin nga underground a mabati lattan ket dagiti electrical wires ken awan ton dagiti spaghetti lines, sagging lines, ken dangling lines para kadagiti sumaganad a tallo agingga lima a tawen. Nangrugin iti umuna a paset ti programa manipud Barangay Sevilla agingga Barangay Lingsat iti ciudad ti San Fernando.
Ti proyekto ket nairanta tapno ital-o iti kinatalged ken proteksyon dagiti motorista kasta met a panangsalaknib kadagiti linya tunggal adda iti agduprak a didigra.
Babaen daitoy ket protektadon dagiti kable ti internet a nakakabil iti 7-way micro duct isu a kasapulan metten a gumatang iti bukod da a conduits ti tunggal telcos nga addaan ti operasyon ditoy probinsya. Innayon ni de Guzman nga awan iti pannakatantan agsipud ta sakbay a maputed dagiti linya ket adda a dagosen ti nakasaganan a kaadugtong na iti baba.
Ipanpanawagan na met a suportaran ti inisyatiba para iti nalinlinis a buya ti kalsada kas paset ti program ti turismo a cleaning and clearing obstructions on the road.
Mainaig iti daitoy ket nakikoordinar dan kadagiti maseknan nga ahensya ken dadduma pay a departamento mainaig iti enerhiya tapno saan a mapurnada iti operasyon.
Iti sabali a bangir, maysa pay nga impannakkel ni de Guzman ket nupay immun-una a nangaramid iti kapada a programa ti ciudad ti Davao ket maysa a kilometro metlaeng iti naiwayat kadakuada bayat a ti La Union ket province-wide wenno amin a paset ti probinsya iti maipasidong ti underground cabling – kaunaan para ti intero a Pilipinas.
