Nagsapata ni Iranian Foreign Minister Abbas Araqchi nga aramaten da amin a wagas tapno madepensaan ti soberanya kalpasan ti panagbomba ti Estados Unidos kadagiti tallo a nuclear facilities ti Iran.
Kas panangibales ket nangipatayab met ti Iran kadagiti ad-adu manen a missiles nga agturong idiay Israel a nagdisso kadagiti ciudad ti Tel Aviv ken Jerusalem. Nangigubuay daitoy ti pannakadadael ti sangkabalayan ken nakadunoran dagiti sibilyan. Gapo iti daitoy ket naipangaton ti 16 ti bilang dagiti nasugatan.
Nagpakdaar ti Iran a saan da nga agpakigla iti Estados Unidos ken kinondenar pay iti ilegal nga opensiba dagitoy. Segun kadakuada, awan ti radioactive materials a nabati a mabalin a sumabog kadagiti binomba da a pasilidad sadiay Natanz, Isfahan, ken Fordo.
Iti sabali a bangir ket impannakkel ni Trump ti naballigi nga operasyon kasaruno ti panagpangta na iti nasursurok pay a panagbomba nga isayangkat da idiay Iran nu saan da nga ag-surrender. Inusar ti Estados Unidos dagiti 30 Tomahawk missiles ken bunker-buster bombs tapno dadaelen dagiti nasao a nuclear facilies.
Maibasar iti datos ket dumanonen ti nasurok 430 ti natay idiay Iran bayat a 24 met iti biang ti Israel manipud idi napartuat ti gyera da idi Hunyo 13.
Nangipadanon metten iti pakaseknan da dagiti nagduduma a pagilian para ti kumarkaro a tensyon idiay Middle East ken nagpanawagan ti United Nations iti madagdagos a ceasefire tapno lappedan iti nalawlawa pay a pagtungpalan iti tensyon.
