Inlawlawag ni US Ambassador to the Philippines Lee Lipton nga awan ti anunsio wenno panagpirma mainaig iti Pax Silica iti naituding nga Association of Southeast Asian Nations (ASEAN) Leaders’ Summit ditoy pagilian.
Iti official statement ita a Domingo, Nobiembre 8, inlibak ni Lipton dagiti report a nga adda ti anunsio maipapan iti nadakamat a proyekto iti summit wenno iti panagtaripnongda kenni Presidente Ferdinand Marcos Jr. ken US President Donald Trump.
Segun kenni Lipton, maipasidong pay nga umuna iti nainget a konsultasyon ti nasao a proyekto kabinnulig ti gobierno ti Pilipinas sakbay a maaddaan ti aniaman a desision.
Mainaig iti daytoy, kinuna met ni Philippine Ambassador to the United States Jose Manuel Romualdez a nalabo a maisapinal ti katulagan ti Pax Silica iti ASEAN Summit gapu ta agtultuloy pay laeng ti negosasion.
Nakaituding a sumarungkar ni US President Donald Trump iti pagilian ita a Nobiembre tapno tumabuno iti nasao a Summit.
Malagip nga idi maikadua a kuarter ti tawen, naipakaammo iti publiko ti singasing a mangbangon iti nasurok a 1,600-ektaria nga AI data center idiay Capas, Tarlac iti sidong ti gannuat ti US a Pax Silica.
Nakagun-od daytoy ti pammabalaw manipud kadagiti progresibo a grupo ken komunidad ti Aeta idiay Capas gapu ti posible nga epekto ti proyekto iti daga ken pagbiaganda.
