BR LA UNION – Nakatuding a maisayangkat ti maysa a jobs fair idiay Agoo Civic Center inton Abril 30, 2026.
Ti nasao nga aktibidad ket paset ti pannakarambak ti Patronal Town Fiesta ken 21st Dinengdeng Festival, a pakaitampokan ti nabaknang a kultura ken tradisyon ti ili ken manglukat metten daytoy iti baro a gundaway tapno makasapol ti panggedan dagiti job seekers.
Namnamaen ti pannakipaset iti jobs fair dagiti nadumaduma a lokal ken internasiyunal a kompanya manipud iti manufacturing, retail, hospitality, business process outsourcing (BPO), ken overseas employment sectors.
Manamnama pay a mangi-diaya da ti nadumaduma a posisyon babaen ti on-the-spot hiring process.
Malaksid iti direkta nga aplikasyon iti trabaho, addan pay dagiti maidiaya a libre a serbisyo kas ti resume evaluation, career coaching, ken interview tips tapno mapaadu ti tsansa dagiti aplikante a maawat iti tarigagayda a pagtrabahuan.
Mabalakadan dagiti agturong iti job fair nga agitugot ti updated a resume wenno curriculum vitae, valid ID, ken dadduma pay a napateg a dokumento kas iti diploma, transcript of records, ken sertipiko ti panagsanay wenno kapadasan iti trabaho.
Naibalakad pay kadagiti aplikante nga agsuot ti nadalus ken propesyunal a kawes kas panagsagana iti interbiyu kadagiti employers.
