BR LA UNION – Kinumpirma ti pamilya ni Chief Presidential Legal Counsel Juan Ponce Enrile a sibibiag pay ken agtultuloy a lumablaban daytoy kalpasan a naiturong iti ospital idi Martes, Nobyembre 11, 2025.
Iti maysa a social media post ni Ramon Tulfo, imbinglay na iti impormasyon manipud iti anak ni Enrile a ni Jack Enrile, a nangibaga a sibibiag pay ti sigud a senador, ngem aminado ti miyembro ti pamilya a mabalin a pumusay anyaman nga oras.
Immuna nga inwaragawag ni Senador Jinggoy Estrada kadagiti kakadwa na idiay Senado, a naiturong ni Enrile iti intensive care unit (ICU) gapu ti sakit a pulmonya.
Iti official statement nga inruar ti anak a babai ni Enrile a ni Katrina, imbaga na nga agtultuloy a maipas-pasidong iti treatment ken nagyaman iti inawaganna nga ‘incredible medical team’ a mangas-asikaso iti ama na.
Ni Enrile ket 101 years old ngem maibasar iti rekord ti Iglesia Filipina Independiente (Aglipayan Church) idiay Cagayan, ti pudno a petsa ti pannakaiyanak na ket Hunyo 22, 1922, adayu iti nakalista iti ospital a Pebrero 14, 1924.
