BR LA UNION – Nailista iti kababaan a budget deficit sipud timmama iti COVID-19 pandemic ditoy pagilian idi 2024, segun kenni Department of Budget and Management (DBM) Secretary Amenah Pangandaman.
Kaipapanan ti budget deficit a dacdackel ti magasgastos kumpara iti mapaspastrekan ti gobyerno.
Iti maysa nga statement, inpadamag ti sekretaryo a bimmaba iti budget deficit iti P1.506 trillion wenno kaibatugan ti 5.7% a gross domestic product (GDP) ti pagilian.
Mangipakpakita daytoy kunana ti improvement manipud iti 6.2% a budget deficit a nailista idi 2023 ken limbes pay iti namnamaen a revenue ken spending performance.
Inlanad pay ni Sec. Pangandaman a ti budget deficit idi 2024 ket simrek iti fiscal outlook ti Development Budget Coordination Committee (DBCC) iti naudi a panagtataripnong.
Segun kenni Sec. Pangandaman, iti napintas a performance ket mangipakita nga adda progreso ti pagilian iti sidong ti socioeconomic agenda ken napapigsa a posisyon ti pagilian kas maysa a dynamic emerging economy iti Asia-Pacific region.
Gaputi daytoy, siniguro ni Sec. Pangandaman nga agtalinaed a committed dagiti economic managers ti pagilian iti panangpapigsa pay ti fiscal consolidation kabuyog ti panangi-prayoridad iti napaut nga investments iti napapateg a sektor kas iti imprastruktura, edukasyon ken healthcare para iti agtultuloy a panagrekober ti ekonomiya.
Siniguro pay ti opisyal a makatulong dagiti nasao a panangikagumaan tapno makapartuat ti ad-adu a trabaho, panangingato ti pamastrekan ken panangibaba ti kinakurapay ditoy pagilian.
