LA UNION – Natayen ti kadackelan a buwaya ditoy lubong a nakapupok, iti edad a 110.
Ni Cassius nga agdagsen iti nasurok maysa a tonelada ken agrukod iti 18 a pie, ket nangrugi a kimmapsot ti salun-at na sipud pay idi Oktubre, segun kadagiti mangay-aywan kenkuana.
Nagun-od ni Cassius ti titulo iti Guinness World Record kas world’s largest saltwater crocodile in captivity wenno kadackelan a buwaya ditoy lubong, kalpasan ti pannakatay ti buwaya ditoy Pilipinas a ni Lolong idi 2013, nga agrukod iti 6.17 m (20 ft 3 in) ti kaatiddogna, segun iti Guinness.
Sakbay a nakawtibo ken naiturong ni Cassius iti Marineland Melanesia Crocodile Habitat idiay Green Island, iti aplaya ti Cairns, Queensland, daytoy ket nagbi-biag iti kadanuman ti Australia.
Segun kadagiti caretakers ni Cassius, lakayen daytoy ken mapapati a nagbiag iti nalab-labes pay ngem iti lifespan ti maysa a saltwater crocodile a 70-75 years.
Naamwan a nagnaed iti sanctuario ni Cassius sipud pay idi 1987 kalpasan a naibiyahe manipud iti kabangibang a Northern Territory.
Dagiti buaya ket maibilbilang a tourist attraction iti nasao a rehiyon ket ni Cassius iti nagserbi nga star attraction.
Ni Cassius, ket agdindinamag idi a notorious iti kadanuman idiay Australia, ngem na-capture idi 1984, asideg iti cattle station idiay Finniss River, iti abagatan a laud ti Darwin, iti Northern Territory ti Australia.
Idi natiliw ti nasao a buwaya, mapattapatta nga agtawen ni Cassius iti nagbaetan ti 30 ken 80 ken naka-aramid iti record kas largest crocodile ever captured alive in Australia.
Tallo a tawen kalpasan ti pannakatiliwna, naiyakar ni Cassius idiay Green Island babaen ti crocodile hunter a ni George Craig, a nangipasdek ti Marineland Melanesia idi tawen 1969.
