BR LA UNION – Natalged a naiyakar dagiti pasahero ken crew ti maysa a cruise ship a natamaan ti hantavirus outbreak.
Segun kadagiti opisyal, awan kadagiti nasao a pasahero ti nakitaan ti sintomas ti sakit, idi maiyakar dagitoy manipud iti nasao a barko.
Naiturong da idiay Tenerife airport usar iti military bus sakbay a nailugan dagitoy kadagiti eroplano nga agturong iti bukod da a pagilian.
Nairut a maipat-patungpal iti no-contact policy kadagiti pasahero tapno maliklikan iti posible a panagwaras ti virus.
Inrekomenda ti World Health Organization (WHO) iti 42-nga aldaw a quarantine para iti amin a naglugan ti barko kas panagannad.
Kabilang kadagiti pagilian a nagpatulod ti eroplano na para kadagiti kailyan da ket iti Spain, France, United Kingdom, Canada, United States, Netherlands, Turkey, Ireland, Australia, ken dadduma pay.
Maibasar iti report ti WHO, adda iti sumagmamano a sigud a pasahero a pimmanawen iti barko ti nagsakit, ken tallo kadakuada ti pimmusay.
Mapapati a naala ti impeksyon sakbay pay a naglugan da iti cruise ship, ken nagwaras kabayatan ti biyahe.
Kabayatanna, siniguro dagiti health authorities a maibaba ti peligro ti virus iti publiko ken agtultuloy ti nainget a panagamiris ken monitoring kadagiti naapektaran.
Kalpasan ti evacuation, iti barko ket madalusan ken ma-disinfect idiay Netherlands, bayat a sumagmamano laengen a crew members ti agtaltalinaed para iti operasyon daytoy.
