Impaganetget ti House of Representatives a saan nga agkulpa daytoy kadagiti political threats ti Partido Demokratiko Pilipino (PDP) mainaig iti naituding a panagbutos iti impeachment ni Bise Presidente Sara Duterte ita nga aldaw ti Lunes, Mayo 11.
Segun kenni Deputy Speaker Paolo Ortega V, saan a mabuteng, ma-blackmail, wenno malapdan dagiti kongresista a tungpalen dagiti pagrebbenganda iti konstitusion, karaman iti panangtalantan kadagiti impeachment complaints.
Daytoy a waragawag ket kalpasan a nagpakdaar iti PDP a mabalin nga i-blacklist ken kalabanen inton sumaruno nga eleksion dagiti mammanday-linteg a pumabor iti impeachment ni VP Sara.
Innayon ni Ortega, ti napateg iti Kamara ket iti timek ti umili a Pilipino ken saan a ti maysa a partido a kunana a mangikagkagumaan a mangpapigsa manen ti impluensiana.###
