Inlawlawag ti kampo ni sigud a Negros Oriental Congressman Arnolfo “Arnie” Teves Jr. nga awan ti special treatment ti sigud a mamanday-linteg a nakakulong sadiay New Bilibid Prison (NBP), Muntinlupa City.
Segun iti legal counsel ni Teves a ni Atty. Ferdinand Topacio, pimmabor da nga umanamong ti amin a rules para kadagiti balud, karaman ditan ti panangibinglay ti kulongan ni Teves kadagiti sabali a balud.
Daitoy ket tapno maliklikan ti aniaman a posible a panangbabalaw kenni National Bureau of Investigation (NBI) Director Jaime Santiago nga immunan a dinakamat ti temporario a pannakaibalud ni Teves nga agmaymaysa sadiay Building 14 ti Bilibid.
Segun pay kenni Atty. Topacio, kas kadagiti sabali a kulongan ket makadwa ni Teves dagiti sabali pay nga inmate ti maysa a 10 square meter cell nga addaan iti bunk bed, maysa a toilet, ken bassit nga electric fan.
Maipalagip a naan-anayen a naipadeport ni Arnie Teves ditoy Pilipinas idi aldaw ti Huebes kalpasan nga arestaren dagiti otoridad ti Timor-Leste ka nagkiddawan na ti asylum.
Naiturong ni Teves idiay NBI headquarters sadiay Maynila, rabii ti Huebes nu sa dino ket naipasidong isuna ti booking procedure ken medical examination.
Nagtutuon ti kaso a sangsanguen ni Teves ditoy Pilipinas karaman ti Pamplona massacre nga isuna iti maitudtudo a nangpapatay kenni sigud a Negros Oriental Governor Roel Degamo ken kadagiti siam a dadduma pay.
