Impaganetget ti kampo ni sigud a Negros Oriental Representative Arnolfo ‘Arnie’ Teves Jr.nga awan iti panggep wenno intensyon ti sigud a kongresista a tumakas.
Pinasingkedan daitoy ti abogado na a ni Atty. Ferdinand Topacio tapno ipadanon na kenni Department of Interior and Local Government Secretary Jonvic Remulla. Tarigagay nga ilawlawag ti kampo nga awan ti aniaman a plano na a tumakas kabayatan ti panagtalinaed na iti ospital.
Kinuna ni Atty. Ferdinand Topacio nga adayo a mapasamak iti panagtakas agsipud ta adda iti nakakabit a tubo iti agong ni Teves a dumanon agingga tiyan na tapno laeng makapangan.
Innayon na pay a nakakonektar iti tubo kadagiti tallo a bote ti medikasyon a dumiretso met kadagiti urat ni Teves isu ket saan pulos isuna a makapigsa. Saan na met pulos a maaramidan iti aniaman a pisikal nga aktibidad wenno tumakas paruar iti Philippine General Hospital a nakaoperaan na.
Maipalagip a naoperaan iti sigud a kongresista kalpasan a makapadas iti nakaro a panagsakit iti tiyan iti uneg ti pagbaludan na idiay Camp Bagong Diwa, Taguig City.
