Inaprobaranen ti Department of Budget and Management (DBM) ti kanayunan a 4K nga posisyon ti Philippine Coast Guard (PCG).
Daitoy a rinibu a posisyon ket buklen dagiti 819 PCG officers ken 3,181 non-officers.
Gapo kagiti 4K a baro nga posisyon, addaan itan ti PCG ti pakabuklan nga 34,430 personnel ken officials manipud iti agdama a 30K.
Kinuna ni Budget Secretary Amenah Pangandaman a ti kanayunan a personnel ket tapno mapapigsa ti operational capability ti PCG, babaen ti ad-adu a manpower.
Pakairamanan ditoy ti napirpirmis nga maritime safety administration, marine environmental protection, maritime security and law enforcement ken maritime search and rescue.
Mangnamnama met ti DBM a ti kanayun a 4K personnel ti PCG ket mangpapigsa ti isaysayangkat daitoy a monitoring ken panagpatalinaed iti kapia idiay West Philippine Sea (WPS).
Immuna a kummiddaw ti PCG ti kanayunan a tao da kas paset ti 2024 target da babaen ti pito tawen a recruitment plan.
Babaen iti daitoy a plano, namnamaen a dumanon ti agingga 37,869 ti agbalin a pakabuklan a manpower ti PCG inton dumteng ti 2026.
