LA UNION – Impaganetget ni Dasay, San Juan, La Union Punong Barangay Rosalinda Pal-et a temporayo laeng a naiserra iti barangay hall-da gapu ti pannakakumikon dagitoy iti nagsasaruno nga aktibidad kadagiti napalabas ng aldaw.
Iti pannakiuman ti Bombo Radyo kenni Kapitana Pal-et, kinunana nga awan iti kinapudno dagiti alegasyon nga indanon dagiti sumagmamano a residente iti estasyon a pinagur-uray dagitoy dagiti barangay official iti ruar ti barangay hall tapno mangala wenno agpapirma kadagiti dokumento.
Iti panangilawlawag ti punong barangay, sipud idi campaign period ket manmanu nga agturturong iti barangay hall dagiti padana nga opisyal gapu ta makomikom dagitoy nga agkamkampanya, ngem ipaganetgetna nga adda met iti dadduma a kameng ti barangay nga agbanbantay ken mangbaybayabay kadagiti agkidkiddaw ti tulong.
Kadagitoy laeng napalabas nga aldaw ket nagbalin manen a makumikom dagiti opisyal ti barangay gapu iti pannakipasetda iti ‘Brigada Eskwela’ isu a nagpagnunummuan dagitoy a temporaryo nga iserra ti barangay hall ken ituloy ti operasyonda inton aldaw ti Lunes tapno maikkanda met iti gundaway nga aginana.
Impanamnama ni Kapitana Pal-et a malukatan ti barangay hall ken adda dagiti madanun nga opisyal iti barangay a naka-duty.
Nagkiddaw met iti dispensar ti opisyal kadagiti saan a naragsakan iti pannakaiserra ti barangay hall ken no adda man ti nagkurangan dagitoy a panangipaay ti serbisyo.
Ngem nagyaman met ni Pal-et ti pannakaawat kadakuada a mangidadaulo ti barangay iti laksid ti nasao nga isyu.
