Nagserbi a host venue para iti panglukat a programa ti umuna a Senador Sonny Angara Elyu Friendship League idiay ili ti Bacnotan, La Union.
Naluktan ti Friendship League babaen iti impaay a mensahe ni Vice Mayor Francis Fontanilla ket impaganetgetna iti kinapateg ti nasalun-at a kompetisyon.
Imbaga ti Bise Mayor nga agtultuloy ti suporta ti ili a Bacnotan kadagiti atleta nangruna dagiti pumapana ti Bacnotan National High School.
Kinunana pay nga adda plano ti munisipiyo a mangibangon ti Bacnotan Sports Center.
Nangipaay met ti mensahe kadagiti atleta da Bacnotan National High School Principal Elsie V. Mayo, Justo “Tito” Orros III ken Mr. Jasper Nuñez manipud iti opisina ni Senador Angara.
Imbes a panangsindi ti sulo, naisayangkat ti Ceremonial Archery Shooting a simbolo iti panangrugi ti Friendship League ken panagkaykaysa dagiti atleta para iti nasalun-at a pasalip.
Immunan a naangay ti cycling competition a nangrugi itay agsapa manipud ili ti Pugo agingga iti Bacnotan.
Adda pay Bancathon ken Archery Competition idiay Bacnotan National High School.
Malaksid kadagiti taga La Union, nakipaset pay iti pasalip dagiti atleta manipud probinsiya ti Tarlac ken siyudad ti Baguio.
Naipatungpal ti Friendship League babaen ti tulong ti Philippine Sports Commission, Provincial Government of La Union ken Municipality of Bacnotan.
