BAGUIO CITY – Nasuspende ti klase manipud pre-school agingga iti senior high school idiay siudad ti Baguio kalpasan ti ginggined a nangdayyeg kadagiti paset ti Cordillera Region itay agsapa ti Huwebes, Oktubre 9, 2025.
Maibasar iti report ti Philippine Institute of Volcanology and Seismology (PHIVOLCS), nairekord ti ginggined a magnitude a 4.4 ken ti epicenter na ket iti ili a Pugo, La Union.
Nupay saan a napigsa ti magnitude, dimmanon daytoy iti Intensity V idiay siudad ti Baguio, a gapu iti dagus a pannakasuspende ti klase kas panagannad.
Gapu iti napigsa a panagdayyeg, dagus a naibakuit dagiti pasyente ken staff ti Cancer Center ti Baguio General Hospital and Medical Center tapno masigurado ti kinatalgedda. Iti maysa nga hotel ti siyudad, napilitan a nagbakwit dagiti sangaili a nakipaset iti maysa a taripnong kalpasan a nagungun ti pasdek.
Sumagmamano nga estudiyante ti Baguio City National High School iti napukawan ti puot gapu iti nakaro a buteng ken pannakakigtot gapu iti panagdayyeg.
Mainaig iti daytoy, dagus a nakikoordinar ti City Building and Architecture Office nga idauluan ni Architect Johnny Degay kadagiti administrador dagiti pagadalan, mall, ken dadduma pay a pampubliko ken pribado a pasdek tapno masigurado a natalged dagiti estruktura ken awan ti madadael iti tengnga ti ginggined.
Impasigurado pay ti lokal a gobierno a maisaysayangkat ti assessment kadagiti dadakkel a pasdek ditoy siudad.
Nagpalagip met ni Albert Mogol, Regional Director ti Office of the Civil Defense – Cordillera, ti publiko a kanayon a nakasagana ken suroten dagiti umno nga addang kabayatan ti ginggined kas iti “Duck, Cover, and Hold.”
Inallokoy pay ti ahensiya ti nainget a panangtungpal kadagiti protocol tapno maliklikan ti aniaman a didigra no adda dagiti aftershock.
Iti agdama, agtultuloy ti panangmonitor dagiti otoridad iti kasasaad bayat nga agtultuloy ti panangsukimat iti posible a pannakadadael iti nadumaduma a paset ti siyudad.
