Mangisayangkat iti rally ti koalisyon dagiti supporters ni sigud a Presidente Rodrigo Duterte sakbay iti maikatlo a State of the Nation Address (SONA) ni Presidente Ferdinand Marcos Jr. aldaw ti Lunes, Hulyo 22.
Segun kenni Major General Jose Melencio Nartatez Jr., hepe ti National Capital Region Police Office, nag-apply iti permit ti “Hakbang ng Maisug” tapno maka-rally idiay Liwasang Bonifacio.
Ngem inlawlawag ni General Nartatez a ti Liwasang Bonifacio ket maysa a freedom park nu sadino mabalin nga isayangkat dagiti political gatherings uray nu awan iti permit a naggapo iti gobierno.
Manamnama iti agarop 5,000 a katao iti dumar-ay ti rally kasta met dagiti nagduduma a progresibo nga grupo ken pro-government demonstrators.
Kabayatanna, agnayon met ti sangaribo a tropa manipud iti kameng ti Philippine National Police ken dadduma pay a law enforcement unit iti gobierno a maideploy para iti seguridad iti aldaw ti SONA; ken agdagupen iti bilang ti tropa ti 23,000.
