Nangiwayat dagiti polis iti dakkel nga operasion kontra iti suspek a mapapati a nangpapatay iti balasitang nga agmaymaysa a matmaturog iti kuartona ti balayda sadiay Dinogon, Barangay Santa Ana, Tagoloan, Misamis Oriental.
Indauluan ni Tagoloan Police Station commander Major Renz Marion Serrano ti panagbirok tapno matiliw ti saan pay a nabigbig a nangaramid iti krimen.
Maibasar iti preliminary investigation, maipagarup a limmasat ti suspek iti tawa tapno sumrek iti kuarto ket ginandatna a ramesen ti matmaturog a biktima ngem limmaban daytoy, gapuanan ta nabagsol ken nagresulta iti ipapatayna.
Innayon pay ti inbestigasion a maysa a menor de edad ti nakakita iti nakaidda a biktima nga agdigdigos ti bukodna a dara.
Mainaig iti daytoy, imbilin ni Tagoloan Mayor Nadya Emano-Elipe kadagiti pulisya a mapadaras ti imbestigasyon tapno maikkan ti hustisia iti balasitang.
Naduktalan a daytoy ket adda iti maikadua a tawen nan ti kurso a Bachelor of Science in Business Administration sadiay Tagoloan Community College.
