Naka-kustodiya itan dagiti innem a lallaki tapno maipasidong iti naan-anay nga imbestigasion no adda pakainaiganda iti pannakapapatay ti 19-anyos nga estudiante iti kolehio idiay Zone 4, Barangay Santa Ana, Tagoloan, Misamis Oriental.
Kasaruno daytoy ti massive pursuit operation nga insayangkat ni Tagoloan Police Station commander Major Renz Marion Serrano tapno masukimat dagiti responsable iti pannakapapatay ti biktima a ni Lady Grace Galo nga agnanaed iti nasao a lugar.
Kinuna dagiti polis nga inyegda ti innem a lallaki iti estasion gapu ta adda dagiti mapagduaduaan a senyales, pakairamanan ti kaadda ti sugat iti ima ti maysa kadagitoy ken kaskasdaaaw a panagpuorna kadagiti sumagmamano a kawesna.
Naala dagitoy a trabahador iti uneg ti bunk house da a saan nga adayo iti balay ti biktima isu nga isuda ti kaasitgan a mabalin nga maimbestigaran.
Inlibakda met a karaman dagitoy ket kinunada nga adda da laeng iti nasao a lugar tapno agaramid iti perimeter fencing iti daga a kukua ti Phividec Industrial Authority.
Adda ti pagilasinan a mabalin a ginandat a marames iti biktima ngem limmaban laeng isu ket binagsolan ti suspek nga isu ti impatay na.
Maikadua a tawen ni Lady Grace iti kurso a Bachelor of Science in Business Administration sadiay Tagoloan Community College.
Naduktalan pay nga aktibo isuna ti simbaanda.
Naammuan a dagiti trabahador a naikustodiya ket saan amin a taga-Tagoloan, sumagmamano kadakuada ket naggapu idiay Cagayan de Oro City ken iti siudad ti El Salvador, Misamis Oriental.
