BR LA UNION – Inarestar dagiti otoridad ditoy La Union ti maysa a mannalon gaputi kaso a qualified rape.
Iti suspek ket nakemmeg dagiti otoridad iti umuna a distrito ti La Union,a agarop alas 10:00 ti agsapa idi Lunes, Marso 3, 2025 maiyannurot iti warrant of arrest nga impaulog ti Regional Trial Court Branch 34 idiay Balaoan, La Union.
Binigbig ni PCol. Heryl L. Bruno, agdama a director iti La Union Police Provincial Office, iti suspek a maysa a 35-anyos a lalaki manipud umuna a distrito ti probinsiya ken maibilang a fourth most wanted person in Region 1 iti listaan ti pulisiya.
Maibasar iti report, iti suspek ket maipagarop a rinames na ti bukod na nga anak nga agtawen ti 10, idi Oktubre ken Nobyembre idi napalabas a tawen.
Kabayatanna, pinadayawan ni Col. Bruno iti operating units gapu iti ballaygi a pannakasapol ken panangarestar iti akusado.
Kagiddan daytoy, inallokoy ti opisyal dagiti biktima iti kapada a krimen, wenn siasinuman nga adda ammo na iti kapada nga insidente,nga i-report a dagus kadagiti otoridad tapno makaiwayat da ti maiyannatop nga addang ken maipaayan ti hustisiya ken suporta dagiti biktima ti krimen.
