LA UNION – Naarestar dagiti dua a Regional Most Wanted Persons babaen iti nagsina a manhunt operations a naisayangkat idi Enero 30 ken 31, 2026.
Idi Enero 30, kinemmeg dagiti operatiba ti Sudipen Municipal Police Station (MPS) kadua ti Regional Intelligence Unit 1 (RIU1/PIT) La Union, Regional Investigation and Detective Management Division (RIDMD), Police Intervention Unit (LUPIU), ken La Union Philippine Investigation and Detection Management Unit (LUPIDMU) iti Top 3 Regional Most Wanted Person.
Nabigbig ti suspek nga agtawen ti 33, maysa a sales assistant, residente ti Alaminos City, Pangasinan ken addaan ti kaso a Sexual Assault ken Acts of Lasciviousness.
Natiliw daytoy babaen iti bileg ti Warrant of Arrest nga impaulog ti Regional Trial Court, First Judicial Region, Branch 34, Balaoan, La Union idi Disiembre 22, 2025.
Kabayatanna, agarup alas-dyis ti bigat idi Enero 31, nakemmeg ti 23-anyos a suspek, maysa a lalaki, sigud a residente ti Aringay, ken naibilang kas Top 2 Regional Most Wanted Person idiay Brgy. Calumpang, Marikina City, Metro Manila gaputi ti kaso a Rape.
Natiliw daytoy babaen iti bileg ti Warrant of Arrest nga impaulog ti Regional Trial Court, First Judicial Region, Branch 33, Bauang, La Union, a napetsaan ti 26, 2026 ken awan ti nairekomenda a piyansana.
Ti pannakatiliw ti suspek ket nagtinnulongan ti Aringay Municipal Police Station kadua ti RID1, LUPIU ken LUPIDMU.
Dagiti suspek ket agpada nga adda iti kustodiya ti pulisya para ti umno a disposision kas maiyannurot iti linteg.
[Reference: PRO1 Public Information Office, LUPPO]
