BR LA UNION – Kinumpiskar dagiti kameng ti Department of Agriculture babaen ti Bureau of Plant Industry kabinnulig da ti Bureau of Customs ti saan a bumaba iti 25 metric tons nga smuggled a nalabbaga a sibuyas manipud China idiay Misamis Oriental.
Segun iti DA, iti cargo ket simmangpet idi Mayo 26 a naideklara a frozen goods kas ti egg noodles, croissant, dough, pizza dough, buns, ken spring rolls.
Immuna a nalapdan ti pannakairuar ti kargamento para iti “kanayunan nga inspeksyon” maiyannurot iti kadawatan ti BPI-Plant Quarantine Service idiay Cagayan de Oro-BOC.
Segun iti DA, naisayangkat ti physical examination idi Hunyo 11 a naka-diskubrian dagiti nalabbaga a sibuyas a saan a nakalista iti manifesto.
Maibasar iti patta-patta dagiti otoridad, daytoy ket agbalor ti P2 million.
Kalpasan ti pannaka-diskubre ket dagus a nai-rekomenda ti panangkumpiskar iti nasao a shipment.
Nagballaag manen ni Agriculture Secretary Francisco Tiu Laurel Jr. kadagiti agpang-panggep nga agiserrek ti smuggled a sibuyas, agsipudta awan iti inruar da nga import clearance iti agdama.
