BR LA UNION – Inaresto dagiti otoridad ti Top 1 Most Wanted Person (MWP) iti provincial level ti La Union kalpasan ti naballigi a joint operation idi kalman, Abril 12, 2026 idiay Sitio Sarok, Camp 7, Baguio City.
Nabigbig ti suspek a maysa a lalaki nga agtawen ti 52, ken residente iti Mamat-ing Norte, Naguilian, La Union.
Naglemmeng ti suspek idiay siyudad ti Baguio ngem sinurot dagiti operatiba babaen ti “Manhunt Charlie Operation.”
Naaresto ti suspek babaen ti bileg ti arrest warrant gapu iti dua (2) a kaso a Qualified Rape, ken awan iti nairekomendar a piyansa.
Ti operasyon ket indaulwan ti Burgos Municipal Police Station (MPS), ken iti pannakitinnulong ti RID-PRO1, LUPIU, PIT-La Union, 2nd LUPMFC, Naguilian PS, BCPO Station, ken CIDU-Baguio City.
Iti agdama, adda iti kustodiya ti Burgos MPS ti suspek para iti umiso a disposisyon.
Ti pannakaaresto ti suspek ket paset iti nairut a kampanya ti Philippine National Police (PNP) kontra kadagiti kriminal nga aglemlemmeng iti linteg.
