BR LA UNION – Inaresto dagiti kameng ti Bureau of Immigration idiay Cavite ti maysa a pugante nga Amerikano a sapsapulen iti pagilianda gaputi panangkidnap ken panangramesna iti maysa nga ubing a mapapati nga agtawen ti 12.
Iti statement, binigbig ni Commissioner Joel Anthony M. Viado ti “fugitive” a ni Young Tom Talmadge nga inaresto ti Fugitive Search Unit (BI-FSU) ti ahensiya.
Ti pannakaaresto ni Talmadge ket imbilin ni Viado kalpasan a nakaawat iti impormasyon manipud US Homeland Security Investigations (US-HSI).
Segun kenni Viado, agtultuloy ti pannakitinnulongda kadagiti international counterparts tapno masalakniban dagiti ubbing a Pilipino ken maitandudo ti hustisiya.
Inlawlawag ti ahensiYa a ni Talmadge ti kangrunaan a puntirya ti arrest warrant a naiyisyu idi Marso 20, 2025 babaen ti 13th Judicial Circuit Court ti Hillsborough County, Florida.
Iti agdama, nakabalud ni Talmadge iti BI detention facility idiay Taguig City ken maur-uray ti deportasyon na.
