BR LA UNION – Natay iti dua a pulis ken maysa nga empleyado ti Bureau of Corrections (BuCor) idi rabii ti Biyernes Santo, Abril 3, kalpasan ti napasamak a pammaltog idiay Barangay Irawan, Puerto Princesa City, Palawan.
Segun kadagiti residente iti lugar, timpuar ti komprontasyon iti baetan dagiti police officers ken sumagmamano a tambay agarop alas-9:40 ti rabii.
Pimmanaw dagiti pulis iti lugar ngem maipagarop a nagsubli da kadwa ti makunkuna a backup a nagresulta iti sabali manen a komprontasyon agingga a nagpi-pinnaltog dagitoy.
Nabigbig dagiti natay nga isuda Police Staff Sergeants Ryan Cris Cabaña ken Jayson Fernandez, nga agpada a nakadestino idiay Puerto Princesa City Police Station 2 ken ni Jerson Ojario Talon ti BuCor.
Immandar metten ni Puerto Princesa City Police Office (PPCPO) Director Police Colonel Cristine Tabdi iti naun-uneg nga imbestigasyon iti krimen ken naiyuswat ti manhunt operation para iti pannaka-arestar dagiti suspek.
Immandar pay ti Police Director a rugyan ti case buildup ken irutan iti operasyon, babaen iti nabukel nga Special Task Group a mangtutok iti kaso.
