BR LA UNION – Nabagsol ti maysa a 26-anyos a construction worker kalpasan a nagbalin a nabara ti komprontasyon da iti suspek idiay Brgy. Carlatan, siyudad ti San Fernando, La Union, idi agsapa’t kalman, Hunyo 24.
Nabigbig ti biktima iti alyas Regino, ken residente ti Brgy. Sentral Laud, Bauang, La Union.
Bayat a ti suspek ket agtawen ti 27, construction worker ken residente ti Brgy. Carisquis, Luna, La Union.
Maibasar iti inisyal nga inbestigasyon ti City of San Fernando Police Station (CSFPS), adda ti biktima iti ruar ti barracks da iti igid ti MacArthur Highway kadua dagiti pada na a trabahador, idi maipagarop a kellat a sinabuagan ti danum ti suspek.
Gapu iti daytoy, kinompronta ti biktima ti suspek ket dinanog na.
Kabayatan ti nabara a sinnungbat dagitoy, mapapati a nangiruar ti suspek ti kutsilyo nga imbagsol na iti biktima, partikular iti baba a paet ti kannigid a barukong na.
Dagus nga intaray dagiti kakadua ti biktima ti nasugatan a lalaki iti pribado nga ospital para ti pannaka-agas na.
Kabayatanna, boluntaryo a simmuko ti suspek kadagiti barangay tanod ti Brgy. Carlatan ken insuko na pay ti kutsilyo a naaramat iti insidente sakbay a naiturong iti City Health and Wellness Center para iti medical examination.
Ti suspek ket adda ita iti kustodiya ti City of San Fernando Police Station para iti umno a disposisyon.
