Nangilatag ti kondisyon ti pagilian a Timor-Leste sakbay a mapalubosan ti deportasyon ti napatakyas a mamanday linteg a ni Arnie Teves Jr., segun kenni National Bureau of Investigation (NBI) Director Jaime Santiago.
Karaman ditoy ti certificate of handover a mangimatmaton a nasken a matratar a makatao ni Teves ken saan a makulong ti lagpas 40 a tawen.
Inlawlawag met ti NBI chief a babaen ti Article 70 ti Revised Penal Code, limlimitaran ti 3-fold rule ti pakabuklan a panawen a mabalin a pagserbian a sentensya ti kulongan ti maysa a convict nga uray pay nagtutuon ti kaso na.
Agingga 40 a tawen iti maximum a pannakaibalud ti maysa a convicted criminal ditoy Pilipinas, laksid ti kaado ken kadagsen ti kaso.
Ti kanayunan pay a kondisyon ket nasken a saan nga agbalin a subject ti torture ni Teves ken rumbeng a maiturong kadagiti detention facilities a maiyannurot iti international standard.
Nadakamat pay ditoy a nasken a saan a masentensyaan ni Teves ti bitay ken rumbeng a maikkan ti patas kasta met ti public trial nga umanamong ti paglintegan ti pagilian.
