BR LA UNION – Napaay iti petisyon nga indatag ni Atty. Mans Carpio, a kumidkiddaw a lapdan iti impeachment proceedings kontra kenni Vice President Sara Duterte.
Daytoy ket kalpasan nga imbasura ti Quezon City Regional Trial Court (RTC) Branch 81 iti reklamo ti kampo ni Carpio.
Segun iti korte, awan ti hurisdiksyon iti RTC a pakibiangan ti bileg ti House of Representatives a mangisayangkat ti impeachment proceedings, maiyannurot iti Konstitusyon.
Pinagkedkedan pay ti korte iti kiddaw a writ of preliminary injunction kontra kada House Speaker Bojie Dy, House Committee on Justice chairperson Rep. Gerville Luistro, ken BIR Commissioner Charlito Martin Mendoza.
Impaganetget ti pagukuman nga adda bileg ti House Committee on Justice a mang-isyu ti subpoena kas paset ti constitutional mandate iti impeachment process.
Kasaruno daytoy ti panang-aprubar ti House Committee on Justice iti Articles of Impeachment kontra kenni VP Duterte, a nakatuding a pagbobotosan idiay plenaryo ti Kamara inton Mayo 11, 2026.
