Pinagkedkedan iti korte ti South Korea iti kiddaw ti special prosecutor nga ag-isyu ti warrant of arrest kontra kenni sigud a SoKor president Yoon Suk Yeol mainaig iti apagbiit na a deklarasyon ti martial law idi Disyembre, napalabas a tawen.
Segun kadagiti abogado ni Yoon, inakusaran isuna ti special prosecutor iti “obstruction” kalpasan a pinagkedkedan na iti panagdar-ay iti interrogation. Kinuwestion met ti legal team ni Yoon iti imbestigasyon ken kinuna a daitoy ket maysa a klase ti “political motive.”
Innayon dagiti abogado na a sumungbat ni Yoon kadagiti sumaganad nga imbitasyon ken agpakitan para ti interrogation a maangay inton Sabado. Imbatad pay dagiti prosecutors a mangiyuswat da kadagiti kabaroan a warrant nu saan nga agparang ni Yoon.
Maipalagip a sumangsango ti sigud a presidente ti insurrection ken dadduma pay a krimen mainaig iti panangideklara na ti martial law a mabalin met nga agresulta iti pannakaibalud na iti tungpal biag wenno pannakabitay.
Ti imbestigasyon ket indauloan ti baro a special prosecutor nga indutok ni President-elect Lee Jae-myung.
Kabayatanna, imbilin met ti hukom iti pannakawayway ti detention ti sigud a defense secretary a ni Kim Yong-hyun – maysa kadagiti nagplano ti martial law.
