Nagdinnungpar ti maysa a kotse ken motorsiklo iti paset ti Gov. Luna St. ditoy Siudad ti San Fernando.
Maibasar iti imbestigasion ti San Fernando Police Station, nabigbig ti driver ti kotse a Mazda 3 nga agmaris ti puraw nga addaan ti plate no. AHA 1258 a ni Jay Neil Gapuz y Cunanan, agtawen ti 29, awanan asawa ken residente ti Brgy. Payocpoc Norte-Este iti ili ti Bauang.
Idinto a nabigbig met ti nangiturong ti motorsiklo a Honda Supremo 150 nga agmaris ti nangisit nga addaan ti plate no. 0101-06191 a ni Robert Abaya y Castillo, agtawen ti 28, awanan asawa ken residente ti Brgy. Baraoas ditoy Siudad.
Maibasar iti Police Blotter, kabayatan a dumaldalyasat ti kotse nga agturong nga agpaabagatan ket dita a kellaat a dimmungpar ti motorsiklo nga agturong met nga agpadaya.
Gapu iti daytoy, nagsagaba ti sugat iti nagduduma a paset ti bagi ti driver ti motorsiklo idinto a saan met a naan-ano ti nangiturong ti kotse.
Nupay kasta, agpada latta a naitaray dagitoy iti CHWC para iti medical examination ken alcohol breath test nu sadino a naduktalan a positibo iti impluwensiya ti nasanger ti driver ti motorsiklo idi napasamak ti desgrasia.
Kabayatanna, saan met pay a nakapagsasarita dagiti agsinnungbangir a partido agsipod ta masapol pay a madeterminar ti balor ti pannakadadael dagiti dua a lugan.
