LA UNION – Immapela ita ti tulong kenni Pangulo Rodrigo Duterte ni La Union 2nd District Congresswoman Sandra Eriguel para iti dagus a pannakatiliw ti mastermind iti pannakapapapatay ti asawa na a ni sigud a Congressman Eufranio ‘Franny’ Eriguel.
Iti pannakiuman ti Bombo Radyo La Union iti mammanday linteg, kinuna na a kidkiddawen na ti tulong ti presidente para iti dagus a pannakarisot iti kaso ti asawa daytoy.
Iti agdama, awan pay iti pakabigbiggan kadagiti dadduma a suspek ken iti mastermind iti krimen.
Mangnamnama met ni Congresswoman Eriguel nga iti kabiitan a panawen ket magun-od ti pamilya na ti hustisya para iti pimmusay nga asawa.
Kabayatan na, inallukoy met ti kongresista dagiti addaan ti impormasyon maipapan iti pannakatay ti sigud a mammanday linteg nga ipakaammo laeng kadakuada para iti naan-anay a pannakarisot iti kaso.
