BR LA UNION – Inummong ni La Union Governor Mario Ortega dagiti media partners babaen iti naisayangkat nga emergency press conference idi kalman, Agosto 5, 2025 idiay Provincial Capitol tapno tamingen dagiti pakaseknan ti publiko ken talantanen dagiti addang nga ipakat iti panawen ti emerhensiya, kas panang-sungbat kadagiti imbati a perdisyo ti Bagyo Emong.
Iti press conference iti local media, inbinglay ni Governor Ortega dagiti rumbeng nga aramiden para kadagiti umili ti probinsiya, kangrunaan dagiti nakaru a naapektaran ti bagyo.
Indetalye ti gobernador dagiti ipakat a dagus nga addang ti provincial government kalpasan ti kalamidad, a ti prayoridad ket panangipaay ti tulong kadagiti biktima ti anyaman a kalamidad, panangtaming kadagiti sakit a mabalin a maala iti panawen ti panagtudo, evacuation centers a pagturongan, suporta kadagiti evacuees, pannakaisubli ti koryente, ken panangibangon dagiti amin a naapektaran.
Nagyaman pay ti gobernador iti amin a responders nga agtrab-trabaho iti bigat ken malem, idi nagrugi ken kalpasan ti bagyo, karaman dagiti volunteers ken dagiti Media Practitioners, ken dagiti nagdonar para iti relief goods para ti amin a constituents ditoy La Union.
