BR LA UNION – Dakkel a volume ti tudo iti napasaran ti probinsiya ti La Union iti napalabas nga uppat nga aldaw ti Agosto a katupag ti maysa bulan a panagtudo, a nagresulta ti panaglayos iti naduma-duma a lugar.
Daytoy ti pinatalgedan ni Engr. Louie Vergara, Weather Specialist II ti state weather bureau, kabayatan ti interview ti Bombo Radyo La Union.
Kinunana a ti dakkel a volume ti tudo nga above normal a napadasan ti La Union ken Benguet iti napalabas nga uppat nga aldaw ket gapu kadagiti epekto ti napalabas a Bagyo Luis, Bagyo Maymay, ken ti napapigsa a Southwest Monsoon wenno habagat.
Maibasar iti kaudian a datos ti ahensiya, 233 mm a tudo ti napadasan idi Lunes ken Martes gapu iti Bagyo Luis bayat nga 180.7 mm a tudo met idi Miyerkoles ken Huwebes gapu iti Bagyo Maymay ken ti napapigsa nga epekto ti Habagat.
Innayon ni Engr. Vergara a nalabsan ti below normal a kaadu ti tudo idi napan a bulan ti Hulyo gapu iti adu a tudo a napasaran iti umuna nga innem nga aldaw ti Agosto.
Agtultuloy ti palagip kadagiti residente nga agnanaed iti nababa a lugar nga agannad gapu iti pangta ti panaglayus ken panagreggaay ti daga, gapu ta manamnama pay laeng ti apagapaman agingga iti napigsa a panagtudo agingga inton Domingo, Agosto 9, 2026.
