LA UNION – Nakasaganan ti La Union Muslim Community ditoy San Fernando City, La Union kadagiti ipatungpal nga aktibidad iti selebrasyon ti Eid’l Fitr ita nga aldaw, a senyales iti panagturpos ti Ramadan ita a tawen.
Daytoy ket laksid iti mapas-pasaran a panagtudo kas epekto iti agraraira a habagat ken pinapigsa ti bagyo Esther.
ItI eksklusibo nga interview ti Bombo Radyo kenni La Union Muslim Community President Roger Verceles, kinuna na nga idi pay rabii a nagturpos iti maysa bulan a fasting wenno panagayuno.
Naminsan pay a linagip ni Verceles a ti panawen ti sakripisyo dagiti Muslim ket saan a mangan wenno mangipauneg ti anyaman a taraon wenno uminom man laeng ti danum, iti oras a panagsamba dagitoy, a masansan a mangrugi iti alas 5:00 ti agsapa aginggat alas 6:00 ti rabii.
Ngem saan a kabilang kunana kadagiti agayuno dagiti ubbing, nataengan, addaan ti sakit ken babbai a masikog.
Inladawan met ni Verceles a ti relihiyon nga islam ket “ very kind ken charitable” isunga ita nga aldaw kunana ket nakatuding a mangipaay ti supot ti grocery items ken adda pay bagas na, para kadagiti mas agkasapolan a pamilya iti lugar dagitoy.
Dagiti met dadduma a Muslim kunana ket agidasar iti taraon para iti amin, muslim man wenno saan.
Ngem sakbay da nga aramiden daytoy ket agsamba da nga umuna iti mosque dagitoy idiay Barangay Cabaroan ditoy syudad, a mangrugi iti oras ti alas 7:00 ita nga agsapa.
