LA UNION – Nairut ita iti panangbantay ti pulisya iti narekobre a lugan a mapapati nga inusar dagiti suspek a nang-ambush iti ag-ama a mayor ken vice-mayor idiay Balaoan, La Union nga inabandonar da idiay paset ti Barangay Nadsaag iti ili ti San Juan.
Iti pannakiuman ti Bombo Radyo La Union kenni C/Ins. Silverio Ordinado Jr., agdama nga information officer ti La Union Police Provincial Office (LUPPO), kinumpirma na a ti nasao a lugan ket inusar a gate away vehicle dagiti suspek.
Segun pay kenni Ordinado, base iti naala ti CCTV footage iti maysa nga pagadalan a dimmalanan ti Toyota RAV 4 color gray ken awanan ti plate number ket agpada iti deskripsyon dagiti nakakita.
Kabayatan na, adda metten iti natalged a kasasaad ni Mayor Aleli Concepcion iti maysa a pagagasan ditoy syudad ti San Fernando idinto nga agtultuloy met a maag-agasan iti sabali nga ospital dagiti dadduma a biktima.
Maipalagip, tinambangan dagiti saan pay nga ammo nga armado a lallaki iti lugan ni Mayor Aleli ken ti ama na a ni Vice Mayor Al-Fred Concepcion a natay kabayatan a matamtaming iti ospital idinto a dead on arrival met ti body guard a ni Michael Ulep.
