LA UNION – Kunkondinaren ti La Union Provincial Government iti napasamak a pannaka-ambush iti ag-ama a Mayor ken Vice Mayor idiay ili ti Balaoan, La Union.
Mainaig iti daytoy, kas Chairman ti Provincial Peace and Order Council, imbilin ni La Union Governor Francisco Emmanuel “PACOY” R. Ortega III kenni La Union Police Provincial Director, PSSupt. Ricardo G. Layug, Jr. iti nauneg nga imbestigasyon ket dagus met a nabukel ti Special Intelligence Task Group (SITG) Concepcion iti panangidaulo ni Deputy Regional Director for Operations Adolfo Samala.
Kabayatan na, siniguro ni Gov. Ortega kadagiti umili ti La Union iti kinatalged dagitoy ket pagtalinaeden iti linak ken kapya iti probinsiya.
Maipalagip, tinambangan dagiti saan pay nga ammo a suspek iti lugan ni Mayor Aleli ken ama na a ni Vice Mayor Al-Fred Concepcion iti sango a mismo ti Balaoan Central School kabayatan nga agturong iti trabaho, a nakatayan ti bise mayor, matamtaming met iti ospital iti mayor idinto a dead on arrival iti body guard na a ni Michael Ulep.
